ഉറങ്ങാത്ത പ്രണയം

എന്നോടൊത്തുള്ള നിന്റെയീ ജീവിതം
എങ്ങോട്ടുപോകുമെന്നാണെൻ ചിന്ത
ശിവ പാർവതിയോ ലക്ഷ്മീ നാരായണനോ
സീത രാമനോ ആവില്ല നാം

ഈ സത്യമറിഞ്ഞിട്ടും നിന്നെയെൻ ജീവിത
വീഥിയിലേക്കെന്തേ ഞാൻ ചേർത്ത് വച്ചു
പിന്നെയും പിന്നെയുമോർത്തു ഞാനങ്ങനെ
ഒരുപാട് നാളുകൾ പിന്നിട്ടു പോയി

മനസ്സിന്റെ അടിത്തട്ടിലൊരിക്കലു-
മുറങ്ങാത്ത പ്രണയം -
വേനലിൽ വാടാതെ , പേമാരിയിലൊലിച്ചകലാതെ
ശരത്കാലത്തുറയാതെ
വസന്ത കാലത്തിൽ വിടരുന്ന പൂമൊട്ടായ്
സമുദായ കിങ്കരന്മാരെയും ജാതി മത വ്യവസ്ഥകളെയും
വെല്ലുവിളിച്ചൊരാ പ്രണയം
നിന്നെയെൻ ജീവനിൽ ചേർത്ത സത്യം.

സമ്പത്തിന്റെ മൂർധാവിൽ നീ കണ്ട
ജീവിതക്കാഴ്ചകളൊന്നുമേകുവാനാളല്ല ഞാൻ
പക്ഷെ
പരിചിതമല്ലാത്ത നിമിഷങ്ങൾ
നിറ മനസ്സോടെ പങ്കുവയ്ക്കാനരികി-
ലെന്നുമുണ്ടാകുമെന്നുറപ്പിച്ചു പറയാം

ഘനീ ഭവിച്ച ഇന്ദ്രചാപം
നീരാവിയായ് പെയ്തിറങ്ങുമ്പോൾ
നിന്റെ പാദസ്പർശമേറ്റ ഭൂമിതൻ
വിരിമാറിലേക്കൊഴുകിയ തുള്ളികൾ
ചേർന്നോഴുകിയ പുഴ തൻ കരയിൽ
നിന്നെയും കാത്ത് ഞാനിരിപ്പുണ്ടാകും .

കാനന ഗന്ധിയായ് വീശുന്ന കാറ്റേറ്റു
മയങ്ങുന്ന ലതകളുമിലകളും
ആർദ്രമാം സ്നേഹ സ്പർശനമാശിച്ചാ-
മരത്തണലിൽ ഞാനിരിപ്പു .

മരങ്ങളോരോന്നായ് വേരറ്റു പോകുന്നു
ജല നിരപ്പുകളുയർന്നു പൊങ്ങുന്നു
ചഞ്ചലമാം കാലാവസ്ഥയിലും നിന്നെയും
കാത്ത് ഞാനുണ്ടാകും

കാണാതെ നീ കടന്നു പോകുമോന്നൊരു
ഭയമെന്നെപ്പിടിച്ചുലയ്ക്കുന്നു .
എങ്കിലുമീ പ്രണയം
എന്നും നിനക്കായ് ..
നിനക്കായ് മാത്രം സൂക്ഷിപ്പൂ